रूड़ीया रुड़ी Bamboo weaver
रूड़ीया या रुड़ी
Bamboo weaver
रुड़ीया ये शब्द सुणि कुछ याद भी आयी या कुछ भी याद नि आयी।
अरे हाँ याद कन करि औंण हम त अपरा गौं गुठयार छोड़ी ते भेर बसी ते शहरी बणी गया बल ।। बोलनक ते उ क्या बोल्दीन बल इंटेलिजेंट हां शायद हम बहुत समझदार बणी गया अर अपर भाषा बोली दगडी अपर रीति रिवाज अर अपर पुराण देवी देवतों , जांद्ररा , घट , गुलाबन्द , हँसुली , धागली , जौ , कोदा , पिस्यांन , बाड़ी , सत्तू , कोंणि , कफली , घेंदुणी , घुघुती , सेंटुली , मुसमेखुडी , दगडी अपरा औजी , लुहार , रुड़ीया तें भी चपट करि भूली बिसरी गया अर हम अग्ने बढ़ी गया।
शायद आप तें मेरु लिखयूं भी समझ नि होलु औंणु पर क्या कन बल जैकु गौ कखि ना जौ। मेरी त आदत चा गढ़वाली भली लगदी अर दगडी दगडी आपरी रीति रिवाज भी।
हाँ शायद के तें अभी भी याद होलु रुड़ीया अगर नि ध्यान औंणु त फ़ोटो देखी समझी ल्या अर मैं भी बोली देन्दु रुड़ीया उ होन्दु छो(अब आप बोल्ला होंदु छो अब नि होंद बल त हाँ अब ना का बराबर ही होंदीन उ भी उ जु अभी कुछ बुढया बच्या छन नई पीढ़ी किले सिखली जब उन तें काम ही नि यमा।) जु हमारा दादी दादा का समय पर रिंगली का सवाल्टा , घिडा(कंडी) , टोकरा(रोटी धना अर मोळ गाडण वाला), ढ़कोली , सुप्पा , अर जु जगह आज प्लास्टिक अर स्टील का टिन अर बनी बनि भाण्डों लिली उ तें बणोंन्दू छो।
अब जब काम ही नि मिल्लू त उन क्या कन आपरी यी कला कु जी का सहारा उंकी ना जणी कति पीढ़ी पले होली अर ना जणी हमारी कति पीढ़ी कु उन काम करि होलु।
मैंतें याद चा ज्यादा पुराणी बात नि या मुश्किल सी 10 या १२ साल पैली हमारा गौं मा एक रुड़ीया औन्दू छों । नौं छो भौंपति ( भूपति ) जु की के पली धार सी पोर जै कु गौं छों शायद चक्रेडा ही छों गौं कु नो जु की हिंदाव की तरफ़ चा या नैलचमी की तरफ चा पक्कू त नि पर नैलचमी की तरफ ही चा वख बटिन हर 2 सर या 3 साल औन्दू छो अर मेरी पट्टी का लगभग सभी गौं मा रिंगाल बुनाई कु काम करदु छों साल का 3 या 4 महीना उ हमारी ही तरफ काम करदु छों । आज गौं मा मेरी रिंगाल बुनाई त भोल कैकी त परस्यो कैकी इन करि एकयोक करि सभु बारी औंदी छें। यखी गौं मा डेरु रोंदू छों वेकु पहली त जैकी बुनाई होंदी छे वेका यख हाँ अगर वीं मौ का यख जगा नि च त गौं मा कैकी ना कैकी दिनी रोंदी छे जगा । होंद क्या छे वे समय पर बुनाई १०० रुपया दिन की धयाडी २वी या 3 टेम कु खाणों अर चा त हमारा पहाड़ मा क्वि बोलणे बात चा। अर जब रुड़ीया अपर गौं जांदू छो वे टेम पर अगर वेकी ब्वारी आयी या क्वि और चा दगड़ा मा त दड़वार का रुप मा जरा जरा नाज-पाणी, चा-चिन्नी या दाल वैगेरह जु भी छो जे मु।
अर हमार घोर मु वेका बनाया टोकरी , कंडी , सुप्पा , जणी बिज्जा धाणी।
शायद 3 या 4 साल पैली वी रूढ़िया अर वेका दगड़ा मा 2वी और जब आयी छा गौं मा त वेका घौर बटि बण-बणाया कंडी , सुपा , सभी धाणी ल्या छा पुछण पर पता चली त अब ना त पैली की तरह सामर्थ रे अर ना पैली की तरह काम-धाम बस अब पूरा साल घोर मु ही बडोन्दा छा अर पूरा मुल्क मा घूमी बेचद छा पर अब गौं मा काम नि रैयी अर ना गौं मा पैली सी चखळ-पखल रैयी बस १ हफ्ता बटिन घूमी क १० या १५ ही चीज बिकींन अब त यूँ तें बोकण की सामर्थ भी नि रैयी अर ना हमारा बाल बच्चों तें यू काम रैयी उ भी अब परदेस चली गिन । होटलों मा अर फेक्टरियों मा लग्यां छन दिन काटण पर।
ठाकरू मेरा त अब दिन ही कतग्या रैगिंन गिणी चुणि सांस छन । पर ये रिंगाली मा अब हमारू भरण पोषण कने सामर्थ नि रैयी ।।
वा आखिरी ही वेकि मेरा गौं मा यात्रा छें ना तब भौंपति आयी ना क्वि नयु रूढ़िया आयी हाँ कंडी , टोकरी , सुप्पा त अभी भी बनना छन , या त आफु छन बाणोंण पड़णा या त दूर क्वि रुद्रप्रयाग की तरफ या कखि और मुलकु मा १ या २वी रुढ़िया ये दंश ते झेली क जिंदा छन उ अभी भी अपणी जिंदगी अर रोजगार की जंग ये पलायन सी अर ये काम का प्रति हमारी बेरुखी सी लड़ण लग्या छन ।।।
आपकु अपणु - शुब्बी {ShUb Bi शुभी }
www.baaduli.blogspot.in
टिप्पणियाँ
एक टिप्पणी भेजें