मेरु मुल्क मैराथन कु बुलाणु चा

उतार दी अब बग्वाली कु खुमार।
ह्वे जा मैराथन कु कमरी कसी तैयार। ।
त्वे तें मेरु मुल्क भत्याणु चा ।
स्वागतों तेरा डांडी कांठी सजाणु चा।।

लोस्तु घंडियाल की 80 थाती देखीयों
थाला-चिलेड़ी बिनसर की सार घुमियों।।
52 गढ़ो मा कु गढ़ बड़ियारगढ़ चा
हे वीर त्वेकु मेरु मुल्क बुलाणु चा।

मंजरा मा घंडियाल त्वे दर्शन देलु
भवाणि माँ कु थान त्वे मुल्क दिखोलु।।
तेगढ़ बाजार त्वे हमारी एकता दिखाणु चा।
मैराथन तें त्वे मेरु मुल्क बुलाणु चा।।

लोदेश्वर महादेव का दर्शन वखि होला
तेरा हर कदम साथ मेरा मुल्की रोला।।
सेरा मुल्क तें छाया क्षेत्रपाल की चा ।।
अबरे दौड़ तेरी खोटियों मेरा बड़ियार की चा।।

रौनक रिगोली प्यारी , चिलेड़ी की सैणि सारी
टक लगे कन कं लगी तेरी जग्वाली
कोखली त्वेकु तें  बिसाणी चा
मैराथन कु मेरा मुल्क बुलाणी चा।।

ताल का सैणा ताल  त्वे घूमोला
चौखंब्या हिवाल भी त्वे दिखोला ।।
चौमास कु कुरेडु डांडियों लुक्याणु चा
हे प्रवासी त्वेकु मेरु मुल्क बुलाणु चा।।

रामलीला भी होंदी पण्डों का पवाडा भी लगदिन
घर गौं खोलों मा देवतों का ढोल आज भी बजदिन ।।
भंकोरु कु शब्द धरती आकाश बिजोणु चा।
हे लड्यूट त्वेकु मेरु मुल्क बुलाणु चा।।

दिन ना भूली नवंबर अठारह कु
याद रखी मैराथन मा आणु कु।।
मान भी होणु सम्मान भी मिलणु चा
हे धावकों तुम तें लोस्तु बड़ियार न्यूतणु चा।।
मैराथन मा 18 nov 2018 कु सामिल होण कु बुलाणु चा।

#ShUbBi
www.baaduli.blogspot.co.in