भिंड्डी खाण कु जोगी बणी छो

भिण्डडी खाण कु जोगी बणी छो

भिण्ढ़डी खाण कु जोगी बणी छो पैले  बासा भुखु रयों।
द्ववी पैसा कमाणा कु नेता बणी छो डबल इंजन नीति की भेंट चडियों।।

साल द्वि तीन्यों बटीन बस्गयाली मेंढ़का सी छो टटराणु
कुछ दसवी पास त कुछ द्वि बच्चों न बाकी रँयु स्युँ आरक्षण न मार दिन्यू ।।

छोटू मोटू समाजसेवी मि भी छो काफी टैम बटीन मुल्क कु।
कभी पंचमी ,होली त कभी बग्वाली का पोस्टर तौं बाँझा कूड़ों पर चिपकोन्दी रयों।।

सभी त रोजगार तें शहरों चलिगी छा , घौर गौ कुड़ा छोड़ी की
आज मंत्री दगडी भोल सरकारी अफसर का गैल
अगलु नेता में ही छो बस ख़्वाब बुण्डी रयों।।

बरसों घाम मा बाल पके की अबकी बारी मेरी तैयारी छे
आरक्षित सीट त क्वी बात नी छे
ई बुढेन्दी दा आँगलियों मा डिग्री अर बच्चों गिंण्डी रयों।।।

जु दसवीं पास छो द्वी बच्चों वलु नी रे , जैका द्वी बच्चा छा उ अँगूठा छाप रे।
सभी तीन तिकड़म करी मैं अग्ने ऐ छो त मैं जनरल रयूँ।।।

पिछली बार परिवार तें डेनिस पार लगेगी छे अबर भक्तों हिलटॉप भी बचे लेली।
मैं त कोणा कु नेता छो , कच्ची कंटर का भरोसा रे गयों।।।।

पूरा देश मा त मंदी च चलनी , उत्तराखंड मा नौकरी भर्ती बस अखबारों मा ही होणी ।
जुगराज रयां युवा नेता तुम खूब खिलयां , बस मेरी चरियों तेरहवीं भात खाण गौं मा ना रयाँ।।